تربية الأبناء والصيام

إمتى أعود ابني على الصيام؟

وبخصوص الصيام نفسه، إيه أهم معاني اعلمها لابني فيما دون البلوغ، وأقوله ايه عن (ليه بنصوم؟)، وإيه العبَر في الصيام؟

وإيه الاتفاقات والمساومات والمفاوضات إللي نعملها عشان يصوموا؟ وإزاي لو هو ما بيقدرش يصبر أقنعه أنا إنه مش هيقدر دلوقتي؟

وإزاي أمرنه على استحمال الصبر على الحرمان من الأكل والشرب؟

 وإيه لوحة الصائم بتفاصيلها وإزاي أعملها؟

أولا  :

 إمتى اعود ابني ع الصيام؟

 بتفرق من طفل للتاني طبعا، لكن بشكل عام:

1-أول ما تلاقيه حابب إنه يصوم..

2-وصحته قوية، وسليم من الأمراض، و ماعندوش مشكلة صحية تخليه محتاج يشرب مية كتير طول النهار ويقلل طول الليل، زي مثلا أصحاب التبول الليلي المزمن- ودة هنتكلم في الاخر عن نشجعه ازاي من غير ما نضايقه لو حابب يصوم.. مش مهم لو جسمه رفيع، المهم صحته كويسه ونشاطه كويس.

3-ويقدر يصبر عالحرمان من الأكل والشرب ولو لحد الظهر أو بصور التمرين اللي هنتكلم عنها.. 

ثانيا  :

 بخصوص الصيام نفسه، أهم معاني تعلميها لولادك فيما دون البلوغ لسة:

1-إيمانا واحتسابا.. 

اعملوا بيها يافطة جميلة كدة وعلقوها.. هي  دي أول حاجة خالص:

 التربية على النية والمقصد الأعلى.. "لله"..

يعني صايم عشان هو مسلم مؤمن بالله ممتثل للأمر الإلهي الخاص بالركن الثالث من أركان الإسلام، ومحتسب للأجر من الله وفقط..

وبالتالي----مفيش شكوى:

أنا عطاش أوي ايه دااا تعبت عاااا! هموت م الجوع بقااا!! ليه يعني ما ينفعش أشرب دة هو بؤ إهيء !!

وبالتالي 

مش بصوم عشان صحابي ما يتريقوش عليا ولا ولاد الجيران يقولوا انت لسة عيل والقطة السودا هتقطع مصارينك، ولا عشان الصيام هيخلي صحتي بمب.. 

وبالتالي ربنا يراني لو أنا صمت قدام الناس فقط لكن من وراهم بشرب وآكل.

لأ.. بصوم عشان ربنا أمرنا بالصيام وده تالت ركن من أركان الإسلام..

2-مقاصد الصيام الأخرى والمهمة...

_لعلكم تتقون  :

الصيام بيربينا على التقوى، عشان الصائم تارك للغيبة والربا والكذب والسحت وأكل مال اليتيم والنميمة واللغو والسباب والشقاق ويراقب الله.

_ الصبر :

الصيام بيربي على الصبر والتحمل والقوة

_الإحساس بالفقير المعدم:

بتعيش حرمانهم فبتحس ولو بحتة من معاناتهم.

_الإحساس بالنعمة والعافية وشكرها لإن

الحرمان من النعمة بيخلينا نعرف قيمتها أكيد ونقدّر قيمة العافية اللي احنا غرقانين فيها ليل نهار وبننسى نشكرها لإننا اتعودنا عليها.

_النظام والوحدة بين المسلمين والطاعة الكاملة  

كلنا بنمتنع عن الأكل في وقت واحد، وكلنا بنبدأ ناكل في وقت واحد، والإشارة إللي بتجمعنا كلنا على دة إشارة واحدة: الأذان.. 

عشان كدة مأمورين بالتعجيل بالفطر "لا يزال الناس بخير ما عجلوا الفطر"

البخاري ومسلم..

 بخير عشان بيسمعوا الكلام وعشان بيحالفوا بدة اليهود والنصارى..

الإحساس بمدى تشابه الصيام مع حقيقة الدنيا ككل بشكل عملي جداااا.. 

وبالتالي التربية على الاهتمام بالآخرة والصبر على المكاره حتى نصل للجنة بإذن الله، بتمرين عملي واقعي جدا ألا وهو الصيام.. إزاي دة؟

رمضان نموذج من الدنيا والآخرة يا ابني يا حبيبي:

تصبر على الشهوات بشروط معينة، يعني مش محروم منها تماما لأ جزئيا، ثم تفرح ف آخر اليوم بشربة مية ساقعة وغيرها وتقول أخييييرا..

و ف آخر الشهر تفرح بالعتق والعيد 

 زي في الدنيا بالظبط: تتقي الله = يكفك الله ما أهمك و تكون الآخرة لك عيدا وتدخل الجنة وتقول أخيييييرا..

ثالثا  :

اتفاقات ومساومات ومفاوضات عشان يصوموا:

1_

اللي مش هيصحى لصلاة الفجر قبل رمضان و في رمضان مش هيصوم.. ايوا تفهميهم كدة، دي فريضة و دي فريضة، بل الصلاة في سنهم دة أولى بالتمرين.. وطبعا لو مبوظ الصلوات كلها يبقا فرصة بقا تظبطيه، ماينفعش يصوم وما بيصليش، كدة هو عاوز يهزر. طب ازاي احببه في الصلاة؟ اتكلمنا عن دة كتييير في مقال العيال والصلاة هتلاقيه ف اخر المنشور وأول تعليق.

2_

الأكل كويس.

سحور.. عالأقل اوي خيارة وساندوتش جبنة أو لبنة، أو تمر باللبن وخيارة أو خيارة وزبادي بالعسل.. وفطار طبعا كويس، مش لازم كتير، لكن يتغذى كويس..

3_

شرب مية كتير من بعد الفطار لحد السحور على جرعات عشان جسمه فعلا ما يتعبش من العطش ويستفيد من المية، مش يقوم يشرب جالون مرة واحدة قبل الفجر عشان دة بيبقا زي قلته..

4_

النوم بدري عشان يعرف يقوم للفجر. وبراحته بعد كدة عاوز يقعد من بعد الفجر لمعاد نومه بالليل براحته، لكن لو نام قيلولة يبقا يادوب نص ساعة كدة عشان يعرف ينام بالليل ويصحى للسحور والفجر. المهم لازم سحور ونوم بدري. واللي مش هيصحى للسحور مش هيصوم، واللي مش هينام بدري مش هيصحا سهلة خالص.. 

فكانوا بيناموا بدري مخصوص من غير فصال لحسن يضيع عليهم.

5_

صيانة اللسان عن الكذب والغيبة والنميمة والزور ووووالخ، تحطيلهم جنب يافطة "إيمانا واحتسابا" كدة يافطة كمان مكتوب عليها "من لم يدع قول الزور والعمل به فلا حاجة لله في أن يدع طعامه وشرابه".. واللي يضايقه اة يغضبه او يسنفزه، يرد عليه يقول: "إني صائم".. أصل إحنا اتفقنا فوووق إن مقاصد الصيام التربية والتقوى.

رابعا  :

أمور جانبية مهمة:

_طب إزاي لو هو ما بيقدرش يصبر أقنعه أنا إنه مش قادر؟ وإزاي أمرنه على استحمال الصبر على الحرمان؟---ممكن قبل رمضان نعوده بتمرين صغنن بإننا نمرنه الأول على الصبر عن شهوة معينة:

 شوكالاتاية معينة مثلا، لبان معين بيحبه، لعبة معينة...الخ،

تدرج في التدريب على عدم التعلق.. ثم ف يوم ياكل فقط جبنة أو عيش فقط.. ثم في يوم يشرب ماء فقط.. و ندرج الموضوع للظهر حبة ثم للعصر ثم للمغرب.. حبة حبة.. لكن يبقى فاهم إن دة تمرين على الصيام، لكن دة مش صيام كامل، وإنه لما يتم صيام اليوم من الفجر للمغرب ممتنعا تماما عن الأكل والشرب = كدة يبقى اسمه صيام..

_طب صحابه بيتريقوا عليه لو مش صايم او صايم للظهر فقط او كدة، بسبب مرضه أو ضعفه أو لسة بيتمرن؟

تعلميه يدافع عن نفسه بالشرع، و دة نموذج لكلامه معاهم: 

أولا:

يا أصحابي أنا لسة دون الحلم والصيام مش فرض عليا لسة، لكن أنا بصوم عشان بحب ربنا ودة تطوع مني حاليا وهاخد حسنات عليه -حقيقة- رغم إني مريض أصلا وربنا قال "ليس على المريض حرج" وقال "وإن كنتم مرضى أو على سفر".. 

ثانيا:

 إنتوا بطريقتكم دي بتخلوا اللي بيصوم بيصوم عشان خايف من التريقة بتاعتكم، يعني مايبقاش عنده إخلاص، وهتاخدوا ذنب على كدة عشان بتساعدوا شيطانه عليه، لإن مالكوش حق تتريقوا وإنتوا مش عارفين حكم المسألة وإن دة جهل بالدين مش مفروض تعملوه.. 

ثالثا:

فيه واحد فينا هنا بيصوم من قدامنا بس لكن من ورانا بيشرب مية ومش هقول هو مين، فهو بيشرب عشان مش قادر لسة ولسة بيتمرن، لكن هو كدة غلطان لإنه كدة فاكر إن ربنا مش شايفه ويهمه نظر الناس له فقط و دة اسمه رياء، وأنا بقا مش عاوز أعمل زيه عشان تفرحوا بيا وخلاص، لأ انا عاوز اصوم صيام الرجالة بجد..

وممكن تتواصلي مع أمهاتهم لو هما صحابك.

_للأطفال اللي عندهم تبول ليلي لحد ما بعد سن 10سنين ومش مقتنعين ان ماينفعش يصوموا ومحرجين انهم كبار خلاص و صحابهم كلهم بيصوموا وطبعا أمر ملفت ومخجل وطبيعي يضايقة  -⬅

اتفقي معاه يا إما يصوم عن الأكل فقط لكن يشرب بس لإن دي أوامر الطبيب وإلا الكلية بتاعته هتتعب من نقص الماء، لإن صعب يبقا مابيشربش مية لا صبح ولا ليل!.. ⬅

يا إما لو مرحلته اتحسنت وبقا بيتحكم في نفسه أحسن يبقا اتفقي معاه انه هيصوم كاملا ماشي لكن بشرط هيشرب كتير من بعد الفطار لحد معاد نومه و هيصحى معاكي بالليل كذا مرة يعمل حمام وهيقوم ضروري جدا للسحور يشرب وياكل خيار وطول النهار مافيش لعب جامد عشان يقلل عطشه...

_ممكن في الاول يبقى متحمس عشان يقلد الكبار وخلاص و يعيش الجو وكدة أو عشان محدش يغلس عليه مثلا...الخ أيا كان النية دلوقتي ظبطيها قدر طاقتك زي ما قلنا و شجعيه عالصيام. و هما مع الوقت بيتعلموا الحاجة مظبوط..

_انا لما ولادي بدأوا يصوموا كان من سن 10 سنين الكبير، والصغير من سن 7، عشان كان بيقلد أخوه طبعا.. عشان كدة الصحبة مهمة استغليها و قوميها.. ودة السن اللي هتلاقيه مكتوب في فتاوى استحباب تمرين الاطفال على الصيام.

بس كان ساعات الولد الصغير يفطر يعني ما يصومش اليوم من أوله. لكن كنت حريصة ان اللي يبدأ اليوم ينهيه بأي طريقة وأصبره ونفرح بعدها..

_طب ولادك مش متحمسين للصيام أصلا..؟ هتحبييهم ف الصيام الأول، وهيفيدك في دة جدااا 

رمضان وبناء الأبناء : 

تدرجي الصيام حسب عمره وحسب جسمه وصحته. و تصبريه بأي لعبة أو تلهيه لو لقيتيه بدأ يشتكي وعاوز يفطر في نص اليوم و كدة، وتقوليله له مكافأة على المغرب لو صبر، لحد ما المغرب يأذن.

دة اللي الصحابة كانوا بيعملوه لما عيالهم تعيط من الصيام النافلة -عاشوراء- بحيث يلهوهم عن الجوع ويشجعوهم على الثبات، ولما المغرب بيأذن بيفرحوا إن اليوم عدى وكانوا شطار وبيدوهم المكافأة..

 قول الربيع عن يوم عاشوراء:

 "فَكُنَّا بَعْدَ ذَلِكَ نَصُومُهُ، وَنُصَوِّمُ صِبْيَانَنَا الصِّغَارَ مِنْهُمْ إِنْ شَاءَ اللَّهُ، وَنَذْهَبُ إِلَى الْمَسْجِدِ، فَنَجْعَلُ لَهُمُ اللُّعْبَةَ مِنَ الْعِهْنِ -نجهز لهم لعبة من الصوف كدة- فَإِذَا بَكَى أَحَدُهُمْ عَلَى الطَّعَامِ أَعْطَيْنَاهَا إِيَّاهُ عِنْدَ الإِفْطَارِ "

البخاري ومسلم

وهيفيدك كمان جدا انك تعملي لوحةالصائم بمكافآت زي دي، فيها مكافآت عينية ومادية عشان -مش كله مادي طبعا-

و دة أسلوب ترغيب مشروع وثابت ولا بأس فيه في الصغر زي ما قلنا قبل كدة كتير، لحد ما يشتد عودهم عالاخلاص التام حبة حبة.. وماتتسوش طبعا زينة رمضان في البيت والفوانيس، بيعملوا جو بهجة و براءة و صفاء وسعادة محبب جدا للأطفال.

خامسا:

تفاصيل اللوحة :

اللوحة دي تطبيقي من نماذج كتير حلوة عالنت، دي ابسطهم، فرخ كرتون و كراسة كانسون و لزق بلو تاك م المكتبة و مشابك صغننة و شريط ستان او خيط خياطة حتى، وبكتب على الفوانيس والهلال المكافأة من ورا.. 

وبما إنه ولادي اللي بيصوموا 2، فكاتبة مكافأة واحدة للاتنين عشان أتجنب الغيرة.. 

بعض المكافآت المادية والعينية زي: كل واحد له لعبة ب5 جنيه، كل واحد له حاجة حلوة ب2 جنيه، كل واحد له ادوات مكتبية ب5جنيه، كل واحد له عندي حضن، كل واحد له عندي دعوة مخصوصة عالفطار، كل واحد له ربع ساعة زيادة عالتابلت، كل واحد هلغي من عنده نص الغرامات اللي عليه، كل واحد ياخد 5جنيه زيادة، كل واحد له شويبس رمان، كل واحد له عندي قصة احكيهاله من الكتاب اللي يعجبه...الخ.

الميزة في النموذج دة اني بكتب فيه كل سنة وأمسح براحتي واطبقها واشيلها للسنة اللي بعدها وكدة. وميزة البلوتاك بيستخدم كذا مرة، بخليه في الحاجات ملزوق واشيلهم بيه وارجع الزقهم تاني..

 عامل زي اللبانة كدة. لازقة بيه اللوحة كمان والحبال.. بس اهم حاجة ثبتوا اللوحة الاول كويس...

 والمشابك ما كفتش فلزقت آخر صف بالبلوتاك عادي.. 

ملاحظة هامة لكِ: